我同寶文第一張合照，影得唔靚。
嗰日落雨，我哋喺碼頭等船。佢件衫濕咗一邊，我就一路搵紙巾，一路怪自己冇帶遮。佢攞起手機話：「咁難得，影張相先啦。」
張相入面，我仲低住頭搵緊嘢。得佢望住鏡頭笑。
後來每次睇返，佢都話，呢張先似我哋。
那些隨手留下的字
寶文鍾意留紙仔。
有時係雪櫃上面一句「有湯，記得飲」；有時係我袋入面一張「今日加油」；去旅行，佢會喺收據背面寫低食過乜、邊間好食、下次要再去邊度。
佢個「寶」字寫得比較闊，「文」字最後一筆就拖得好長。寫得急嗰陣，啲字會愈嚟愈斜。我見到就知係佢，連落款都唔使睇。
我一直冇刻意收藏。
啲紙仔有啲夾喺書入面，有啲放咗入抽屜，有啲連住戲飛同車票，塞喺一個舊餅罐度。
直到搬屋嗰日，我哋先一次過搵返出嚟。
我哋本來諗住用一個下晝執好間房，結果坐咗喺地下兩個鐘。
拎起一張紙，就講返一件事。
嗰次去海邊，買咗兩杯凍飲，未飲完就落大雨。嗰次我煮燶咗晚餐，最後兩個人落街食車仔麵。仲有張佢畫嘅地圖，指我去一間已經搬走咗嘅小店，旁邊寫住：「唔好再行錯。」
有啲事，我以為自己唔記得。
見返佢啲字，就連嗰日講過乜都諗返起。
將她的字，做成一份禮物
我想送佢一份同呢啲回憶有關嘅禮物。
我揀咗幾張紙仔，同以前收到嘅手寫卡，交俾 M4ZI 字作業。製作之前，我同寶文講咗個想法，問佢願唔願意將自己嘅手寫字做成字體。
佢第一句係：「我啲字咁斜都得？」
之後我哋一齊揀字稿、補寫需要嘅字，再睇樣字。佢會指住某個字話：「呢個我平時唔係咁寫。」亦會望住另一個字笑：「呢個真係好似。」
我原本想保留全部驚喜，後來發現，同佢一齊做呢件事，本身已經好開心。
字體個名，我哋叫佢做「寶文體」。
收到禮盒嗰日，佢先見到我一直冇俾佢睇嘅部分。
相框入面，係我用寶文體排好嘅一句：
佢讀完張卡，攞起個相框睇咗好耐。
跟住問我：「點解我用電腦打字，都可以咁似我自己寫？」
我哋又拎返嗰個餅罐出嚟，將入面啲紙仔逐張睇。今次執好之後，我買咗個文件袋，終於冇再將佢哋塞返落去。
讓這套字，繼續走下去
後來，寶文亦同意將呢套字放上 M4ZI 出版。我哋揀咗幾張相，連同呢段故事一齊分享。
我希望有人會鍾意佢嘅字，用嚟寫自己嘅故事。亦希望隨住有人購買字體授權，佢可以透過定期版稅結算，收到一點零用錢，買杯鍾意嘅飲品，或者揀一本想睇嘅書。
如果你問我，點解要將一個人嘅字做成字體，我會俾你睇嗰張碼頭合照，再俾你睇佢留低嘅紙仔。
我想記住嘅，就係呢啲時光。
多謝 M4ZI 字作業，幫我將呢份心意，做成一套真正可以使用、可以分享嘅字。
—— 阿朗